Paosen
Met een dag of wat is 't al weer Paosen. Paosken of Paoschen wordt in 't Drèents ok zegd. Paosen is een Christelijk feest, mor vanolds ok een vruchtbaorheidsfeest. Het neie veurjaor mut ja zorg'n veur een goeie oogst laeter in 'tjaor. Daor hef beveurbeeld het Paosvuur met e 'maoken, het vaarven en eten van eier, het haentie op een stokkie waor de kinder met an de deure langes gaon en het neutenscheeiten. Neuten binnen ja, net as eier, een teeiken van vruchtbaorheid.
Op heel veul steden in het Nedersaksische gebied branden op Tweede Paosdag de paosvuurbulten. Tegenwoordig is 't met griepers en trekkers niet zo stoer meer om een paosvuur te bouwen. Kinder heuiven niet meer bij de huuzen en boerderijen langes om spul op te haelen dat branden wil. Eerder wel. Dan haar de jeugd het drok met de paosbulten. Dat blik wel ut dit gedicht van Arend Mulder ut de olde deus. Het is schreven in de tael van Diever.
Paosvuur-slepen van aleer
Een waegen vol mit takkebossen,
olde maanden, stro en reet,
kookedeuzen, olde kraanten,
't Is de paos-wagen die der geet.
't Is jaorlijks mooi gebeuren.
Moej dat jonkvolkien ies heuren.
"Hei nog 'n olde maande,
Die mit paosen braande,
Hej nog 'n bossien reet,
Aans komp paosen-maendag neet,
Hej nog 'n bossien stro?
Dan komp paosen-maendag vro!
Trökken deur een vlut kwaojonges,
Touwen stevig um de boek,
Trekt ze de waegen deur het dorp hen
en zingt naor old gebroek
Het paosvuur-leedtien van aleer,
Heur tere keelties schrom en zeer.
't Bint de bouwers en de slepers
Veur de paosbulte van 't jaor.
Al daegen laank sleepten ze takken
Uut de bossen, hier en daor.
Zo komt 't paosvuur bij mekaer
En ieder jaor beleev wij 't weer.
Weg bint now de takkebossen.
Olde maanden, 't bossien stro,
De boerenwaegens en de slepers.
De paosbult komt er now mor zo.
't Olde leed uut die tied,
Mor het paosvuur braanden niet.
Arend Mulder
Uut: Oeze Volk, feberwaori 1972.
Overschot... (Dieversdialect)
De Paoshaeze zit mit de poten in "t haor,
Hoe kreeg e toch al die eiern evaarfd dit jaor?
Deur de campagne van Wakker dier,
"Geef de plofkip meer ruimte en piezier",
zaten de hennen iniens veut beter in hun lief.
Werden de dames overmaotig actief.
Deur die veui betere leefomstandigheden,
kwam het iene naor het aandere ei het gat uut egleden.
Zo zat e dus mit een overschot an eiern opescheept
Oh...zuchtte e;
Dan moe'k ze ok allemaol nog vaarven,
gebloemd, geblokt, gestipt, gestreept...
Dat gao ik nooit redden ien mien ientie,
ik bin een hiele vent, maor dat lukt mij nooit allent.
Weej wat, ik zet een advertentie in t van Goortie,
wie wet is er in Diever nog wel een warkeloos hangoortie
die mij helpen wil mit het varven van de eiern.
Maor... hij kreeg tot zien verbaozing
een sollticitaitie brieve uut Beiern.
iene Joseph Ratzinger zat al een poosie zunder wark.
Haar ewarkt as Paus in de roomskathoiieke kark.
Hij schreef; ik neem mien borstel wel mit,
deup die in de vaarve geef dan de eiern de zegen
Dan is't mit een paer slaegen zo gebeurd
Bint ze in een mum van tied allemaol mooi ekleurd.
Gea Tiemens, paosen 2013